இசையரசன் அந்தாதி!

1  பண்ணைப்புரம் எனும் பாங்கான பசுமைசூழ் ஊரொன்றில்

   மண்ணைத்தோண்ட ஒரு மாணிக்கம் முளைத்தது அறிவீரோ

   விண்ணைத்தொட்டதோர் இசையரசன் எங்கள் இளையராஜா

   பண்ணுக்கரசன் புது ராகம் படைக்குமெங்கள் ராகதேவன்.

2  தேவர் மகனின் மாசறு பொன்னிலும் அவன் இழையே

    ஆவர் கடவுளே கேட்போரும், அவன் பொற்திருவாசகமே

    சேவற் கொடியோன் முருகனின் அழகொத்த அவன் ராஜகீதம்

    மூவரும் முககண்ணரும் நற்றமிழும் உருகுமே அவனிசைக்கே.

3  இசையால் வசமானோம் இப்பிறவி பேறு பெற்றோம்  இக்கணமே

    அசையாபபொருளும் அசைந்தாடும் ஆனந்தக்கூத்தாடும்

   விசையால் வேகமுறும் விண்கலமாய்  மனம் உயரப்பறக்கும்

  கசையால் அடித்ததுபோல் மெய் சிலிர்க்கும் கலைஞனவன் சிம்பொனியால்.

4  சிம்பொனி கேட்டிருப்போம் சிலப்பல சமயங்கள், அவ்வொலியின்

    தம்பொருள் புரியாமல் தலை மட்டும் ஆடிடும் தாளம்  போடும.

   செம்பொன் மாணிக்கம் வைரம் நற்பவழத்துடன் அவ்விசையில்

   அன்பொன்றையும் குழைத்து அளித்திட்டான் எம்மிசை ஞானியடா!

5  ஞானியும் நாடுவர் பனிவிழும் நல் மலர்வனத்தை

   தேனி போல் சுற்றுவர் செவ்வந்திப்பூவை அந்தி மழையில்   

   ஊனினை உருக்குமாம் ஜனனீ அம்மா வென்றழைக்குமாம்

   வானிலே வண்ண விண்மீன் விளிக்கும் பொன் மாலைபொழுதை.

6  பொழுதும் அவன் பாடல் அதில் இரவென்ன பகலுமென்ன

   அழுதும் சிரித்தும் பின் சிறிது ஆர்ப்பரித்தும் ஆட்டமிட்டும்

   பழுதாய் போன நெஞ்சில் பால் வார்த்து மருந்திட்டவனை

   எழுதும் பெருமை பெற்றேன், வாழ்க பண்ணைப்புரத்தானே!